Missti af eigin steggjapartí

John Ruddy, markvörður Norwich, missti af eigin steggjun þar sem hann var frekar óvænt valinn í EM-hóp enska landsliðsins.

Þó svo Ruddy hafi verið valinn í hópinn hefur hann fengið leyfi til þess að halda upprunalegum brúðkaupsdegi sem er 2. júní. Sama dag spilar England vináttulandsleik gegn Belgíu.

Ruddy frestaði steggjuninni sem átti að fara fram daginn eftir að Roy Hodgson valdi enska landsliðshópinn. Hann fór í staðinn í rólegt frí til Dubai með tilvonandi eiginkonunni.

"Við félagarnir ætluðum að fara og spila golf í Portúgal. Það voru átta bókaðir í ferðina og ég held að þrír hafi farið og klárað steggjunina án mín. Það var búið að útbúa boli og þeir klæddust þeim."