Solskjær mun ekki taka við Aston Villa

Norðmaðurinn Ole Gunnar Solskjær greindi frá því í gærkvöldi að hann hefði ekki lengur áhuga á að taka við enska úrvalsdeildarfélaginu Aston Villa.

Solskjær flaug með einkaþotu Randy Learner, eiganda Villa, frá Noregi til Birmingham á föstudaginn síðastliðinn til viðræðna um starfið.

En Solskjær mun ekki vera hrifinn af því að flytja fjölskyldu sína frá Noregi og verður því að óbreyttu áfram knattspyrnustjóri Noregsmeistara Molde.

Learner þarf því að leita annað til að finna eftirmann Alex McLeish. Meðal þeirra sem hafa verið orðaðir við starfið eru Paul Lambert, Brendan Rodgers, Roberto Martinez og Gus Poyet.