Drogba í viðræðum við Sjanghæ Shenhua

Kínverska félagið Shenhau frá Sjanghæ hefur staðfest að félagið eigi nú í viðræðum við Didier Drogba.

Drogba tilkynnti í gær að hann myndi fara frá Chelsea þegar að samningur hans við félagið rennur út í sumar. Talið er líklegt að hann gangi í raðir Shenhua þar sem Nicolas Anelka, fyrrum liðsfélagi hans hjá Chelsea, er nú.

„Viðræður félagsins við Drogba eru á áætlun og ganga vel," sagði Zhu Jun, eigandi Shenhua, við fjölmiðla í heimalandinu.

Drogba á glæsilegan feril að baki en á þeim átta árum sem hann var hjá Chelsea vann hann flest það sem hægt var að vinna. Nú síðast átti hann stóran þátt í því að tryggja liðinu sigur í Meistaradeild Evrópu.