Fletcher á góðum batavegi

Skotinn Darren Fletcher er á góðum batavegi eftir langa baráttu við sáraristilbólgu. Vonir standa til að hann geti byrjað að æfa á nýjan leik í næsta mánuði.

Fletcher er 28 ára miðjumaður og á mála hjá Manchester United. Hann hefur verið frá keppni síðan í nóvember en glímt við þennan erfiða sjúkdóm undanfarið ár.

Samkvæmt enskum fjölmiðlum hefur Fletcher gengið vel að ná bata og bindur hann vonir við að fá góðar fréttir frá læknum sínum á næstunni.

Hann hefur nýtt tímann til að hjálpa til á æfingum Manchester United en ef allt fer á besta veg ætti hann að geta byrjað að æfa sjálfur á ný í næsta mánuði.