Ronaldo hissa á að Rio var ekki valinn

Cristiano Ronaldo segist eiga erfitt með að skilja þá ákvörðun Roy Hodgson að velja Rio Ferdinand ekki í enska landsliðið fyrir EM í Póllandi og Úkraínu í sumar.

Ronaldo var áður liðsfélagi Rio hjá Manchester United og þekkjast þeir því vel. „Rio er besti miðvörður Englands og enn í dag einn sá allra besti í heiminum," sagði hann. „Ég skil ekki af hverju hann er ekki í landsliðinu."

Hodgson neitaði því að ákvörðun hans tengdist deilu þeirra John Terry og Anton Ferdinand, bróður Rio. Terry var fyrr í vetur kærður fyrir að vera með kynþáttaníð í garð Ferdinand og verður réttað í málinu í júlí næstkomandi.

Terry var valinn í enska landsliðið en hann og Rio hafa margoft spilað saman sem miðvarðapar landsliðsins.

„Kannski hefur þjálfarinn sínar ástæður," bætti Ronaldo við. „En ég elska Rio, í hreinskilni sagt. Hann er frábær leikmaður, frábær einstaklingur og á skilið að vera í landsliðinu. Hann gæti lagt sitt af mörkum þar og jafnvel hjálpað liðinu að vinna mótið."