Kuyt spenntur fyrir Van Gaal

Hollendingurinn Dirk Kuyt væri ánægður með ef Liverpool myndi ráða Louis van Gaal til starfa, annað hvort sem knattspyrnustjóra eða yfirmann knattspyrnumála.

Kuyt hefur sjálfur verið orðaður við Hamburg í Þýskalandi að undanförnu og því óvíst hvort hann verði áfram í herbúðum Liverpool á næsta tímabili.

Eigendur Liverpool eru sagðir spenntir fyrir því að ráða Van Gaal sem yfirmann knattspyrnumála en sjálfur er hann sagður hafa meiri áhuga á því að gerast eftirmaður Kenny Dalglish.

„Það er óvenjulegt fyrir leikmenn að tjá sig um þá sem koma til greina í starfið," sagði Kuyt við hollenska fjölmiðla. „En hann er Hollendingur, hefur náð frábærum árangri og býr yfir reynslu sem gæti reynst félaginu vel."

Kuyt er nú að undirbúa sig fyrir EM í sumar með hollenska landsliðinu en greindi frá því að Hamburg hefði áhuga á að semja við sig.

„Ef Liverpool ræður stjóra sem vill halda mér og leyfa mér að spila meira en ég gerði á síðasta tímabili getur verið að ég verði áfram. Hamburg er einn möguleiki í stöðunni en mér standa fleiri möguleikar til boða."

Kuyt mun ákveða sig eftir að EM lýkur í sumar.