Villas-Boas kemur ekki lengur til greina

Staðarblaðið Liverpool Echo segir frá því í dag að Andre Villas-Boas, fyrrum stjóri Chelsea, komi ekki lengur til greina sem næsti knattspyrnustjóri Liverpool.

Villas-Boas hefur verið orðaður við starfið síðustu dagana en Kenny Dalglish var sagt upp störfum. Hann fékk þó aldrei formlegt atvinnuviðtal og samkvæmt heimildum blaðsins eru eigendur Liverpool afhuga því að ráða hann í starfið.

Hann hefur einnig verið orðaður við Roma en sagt í fjölmiðlum síðustu daga að hann ætli ekki að velja sér starf í flýti - heldur bíða eftir rétta félaginu.

Þetta gæti þýtt að Roberto Martinez eigi nú meiri möguleika á starfinu en hann á þó enn eftir að hitta þá John Henry, eiganda félagsins, og Tom Werner framkvæmdarstjóra.

Brendan Rodgers og Louis Van Gaal koma einnig til greina þrátt fyrir að sá fyrrnefndi hafi hafnað boði um viðtal í síðustu viku.