Swansea staðfestir samkomulag við Gylfa Þór

Gylfi Þór Sigurðsson hefur komist að samkomulagi við enska úrvalsdeildarfélagið Swansea um að ganga til liðs við félagið frá þýska félaginu Hoffenheim.

Kaup og kjör eru frágengin sem og verðmiðinn sem hljóðar upp á 6,8 milljónir punda eða sem nemur um 1,4 milljörðum íslenskra króna.

Swansea staðfestir þetta á heimasíðu sinni í dag. Þar kemur fram að íslenski landsliðsmaðurinn eigi aðeins eftir að gangast undir læknisskoðun hjá félaginu.

„Swansea er himinlifandi með að hafa gengið frá kaupum og kjörum við Gylfa Þór og Hoffenheim í ljósi stórkostlegrar frammistöðu hans er hann var hjá félaginu að láni á nýloknu tímabili," segir á heimasíðu Swansea.

Gylfi skoraði sjö mörk í átján leikjum og var valinn leikmaður mánaðarins í ensku úrvalsdeildinni í mars.

Gylfi lék með íslenska landsliðinu í tapinu gegn Frökkum í Valenciennes í gær. Hann verður einnig í eldlínunni með landsliðinu í æfingaleiknum gegn Svíum á miðvikudag í Gautaborg.