659 milljónir halda með Manchester United í heiminum

Það halda flestir fótboltaáhugamenn með enska liðinu Manchester United af öllum knattspyrnuliðum heimsins ef marka má nýja könnun sem United birtir á heimasíðu sinni í dag. United hefur tvöfaldað stuðningsmanna hóp sinn síðustu ár og á meðal annars tvöfalt fleiri stuðningsmenn en Barcelona í Asíu.

Kantar, eitt virtasta markaðsrannsóknafyrirtæki heimsins, stóð fyrir könnunni en úrtakið var 54 þúsund manns í 39 löndum. Það kom í ljós að til eru 1,6 milljarðar af fótboltaáhugamönnum í heiminum sem eru svipaðar tölur og í undanförnum könnunum FIFA.

United á alls 325 milljón stuðningsmenn í Asíu, 173 milljónir stuðningsmanna í Afríku og Miðausturlöndum, 90 milljónir stuðningsmenn í Evrópu og 71 milljón stuðningsmenn í Ameríku.

Það er talið að um fjórir milljarðar manna sjái leik með Manchester United á hverju ári en leikir liðsins nást á um 1,15 milljörðum heimila í heiminum.