Carroll þakkar Dalglish traustið

Framherji Liverpool, Andy Carroll er þakklátur stjóra sínum, Kenny Dalglish, fyrir að standa með sér í vetur þó svo hann hafi átt mjög erfitt uppdráttar.

Carroll hefur aðeins skorað 9 mörk í 47 leikjum fyrir Liverpool og þar af hafa þrjú komið í síðustu sex leikjum.

"Kenny hefur sett mikið traust á mig og staðið með mér. Ég hef ekki átt gott tímabil en hann hefur staðið með mér og varið mig ásamt því að hvetja mig til dáða," sagði þakklátur Carroll.

"Sjálfstraustið er orðið betra hjá mér og spilamennskan hefur þess utan batnað mikið. Ég nýt boltans núna. Mér fannst ég þurfa að spila meira og þá myndi þetta koma hjá mér. Það er líka að gerast."