Moses vill spila með stærra félagi

Hinn magnaði framherji Wigan, Victor Moses, ætlar að yfirgefa félagið í sumar. Umboðsmaður hans segir að leikmaðurinn sé tilbúinn fyrir næsta skref á sínum ferli.

Hinn 21 árs gamli Nígeríumaður hefur slegið í gegn hjá Wigan og verða eflaust mörg félög á eftir honum.

"Wigan hefur staðið sig vel og það var rétt hjá honum að fara þangað frá Palace. Ég held samt að Victor sé til í að taka næsta skref," sagði umbinn en Wigan hefur reynt að semja við Moses upp á nýtt en himinn og haf er á milli samningsaðila.

"Hann þarf enn að bæta sig og skora meira. Ég held að það muni koma ef hann spilar með betri leikmönnum. Hann vill spila með betri leikmönnum og þess vegna mun hann ekki framlengja við Wigan."