Stefnir í mikinn slag um þjónustu Gylfa í sumar

Brendan Rodgers, stjóri Swansea, hefur staðfest að félagið ætli sér að reyna að kaupa Gylfa Þór Sigurðsson í sumar. Það verður þó ekki auðvelt því fjöldi félaga hefur áhuga á Gylfa.

Má þar nefna lið eins og Man. Utd, Newcastle, Arsenal, Tottenham, Liverpool og svo Reading sem Gylfi lék með áður.

Ef Swansea ætlar að fá hann þarf félagið að rífa upp veskið. Dýrasti leikmaður Swansea til þessa kostaði 3,5 milljónir punda en Gylfi myndi aldrei fara á minna en 8 til 10 milljónir punda.

"Gylfi hefur verið frábær fyrir okkur og hefur notið sín. Við erum að reyna að semja við Hoffenheim. Við erum bjartsýnir á að geta keypt hann," sagði Rodgers.

Ekki er samt víst að Hoffenheim vilji selja og þjálfari liðsins býst við Gylfa í sínu liði næsta vetur.