Defoe líður eins og leikmanni unglingaliðs Tottenham

Jermain Defoe, framherji Tottenham, hefur staðfest að hann hafi farið fram á að vera lánaður frá félaginu janúar síðastliðnum.

Defoe hefur átt erfitt uppdráttar hjá Spurs og ekki fengið að spila mikið. Hann hefur aðeins verið í byrjunarliðinu ellefu sinnum í vetur.

"Ég vildi ekki fara en ég hugsaði að ég þyrfti að spila og því bað ég stjórann um að fá að fara eitthvert að láni. Hann vildi ekki missa mig því félagið væri að reyna að afreka eitthvað sérstakt. Hann bað mig um að vera með og ég gerði það," sagði Defoe.

"Ég hef samt ekki fengið tækifærin nema einhver meiðist. Stundum líður mér eins og ég sé leikmaður unglingaliðsins því þeir vita að það skiptir ekki máli hvernig þeir standa sig á æfingum. Þeir fá samt ekki tækifæri þegar helgin rennur upp."

Defoe er engu að síður vongóður um að komast í EM-hóp enska landsliðsins.