Sir Alex: Vonandi gera City-menn eitthvað heimskulegt á sunnudaginn

Sir Alex Ferguson, stjóri Manchester United, bindur vonast til þess eins og allir United-menn að nágrannarnir í Manchester City misstígi sig í lokaumferð ensku úrvalsdeildarinnar á sunnudaginn og gefi United-liðinu tækifæri að vinna þrettánda meistaratitilinn undir stjórn Sir Alex.

Manchester-liðin eru jöfn að stigum en City-liðið hefur átta marka forskot í markatölu. Manchester City fær QPR í heimsókn á sunnudaginn á sama tíma og Manchester United heimsækir Sunderland.

„Við getum aðeins gert okkar besta og reynt að vinna okkar leik. Vonandi gera City-menn síðan eitthvað heimskulegt á sunnudaginn," sagði Sir Alex Ferguson á blaðamannfundi.

„Þetta er frábær staða fyrir hlutlausa og fyrir fjölmiðlana en þetta er algjör pína fyrir félögin," sagði Ferguson.

„Það búast allir við því að City verði að vinna sinn leik til þess að taka titilinn en þetta er líka krefjandi verkefni fyrir þá. Það yrði gríðarlega vonbrigði fyrir þá að tapa leiknum og sú pressa getur haft sín áhrif," sagði Ferguson.

Ferguson notaði líka tækifærið og gagnrýndi hvernig Mark Hughes, núverandi stjóri QPR, var rekinn frá Manchester City.

„Það var skelfilegt hvernig þeir ráku Hughes og ég held að flestir séu sammála um það. Ég veit ekki betur en konan hans vissi það á undan honum," sagði Ferguson.

„Þetta var sjokk á sínum tíma en ég held að þetta skipti Mark ekki miklu máli lengur. Hann var stríðsmaður þegar hann spilaði sjálfur og öll liðin hans eru spegilmynd hans. Það yrði gaman fyrir hann að vinna leikinn en hann mun fyrst og fremst hugsa um að halda sínu liði í deildinni," sagði Ferguson.