Vincent Kompany besti leikmaðurinn - Pardew stjóri ársins

Alan Pardew, stjóri Newcastle United, hefur verið valinn besti stjóri tímabilsins í ensku úrvalsdeildinni en hann hefur verið maðurinn á bak við frábært gengi Newcastle í vetur. Vincent Kompany, fyrirliði Manchester City, var við sama tækifæri kosinn besti leikmaður deildarinnar á þessu tímabili.

Vincent Kompany hefur verið lykilmaður í vörn Manchester City sem er á góðri leið með að vinna sinn fyrsta meistaratitil síðan 1968 en Kompany tók við fyrirliðabandið fyrir þetta tímabili.

Kompany skoraði einnig sigurmarkið í seinni leiknum á móti nágrönnunum í Manchester United. Manchester City liðið hefur aðeins fengið á sig 27 mörk í 37 leikjum á þessu tímabili en liðið hefur haldið hreinu í 17 leikjanna.

Newcastle er í fimmta sæti deildarinnar eins og á góðri leið með að ná sínum besta árangri síðan 2003-04 þegar liðið endaði í 3. sæti undir stjórn Sir Bobby Robson. Newcastle á enn möguleika á sæti í Meistaradeildinni á næsta tímabili.

Alan Pardew tók við Newcastle-liðinu þegar Chris Hughton var rekinn í desember 2010 og liðið endaði í 12. sæti á hans fyrsta tímabili. Hann hefur gert enn betur á þessu tímabili og lykillinn að því var að ná í framherjana Demba Ba og Papiss Cisse til liðsins.