Kompany: Hungraður í fleiri titla

Vincent Kompany, fyrirliði Manchester City, hefur þegar sett stefnuna á að vinna fleiri titla en City tryggði sér enska meistaratitilinn í gær í fyrsta sinn í 44 ár. City tryggði sér titilinn með tveimur dramatískum mörkum í uppbótartíma og varð enskur meistari á markatölu.

„Ég vil vinna meira og ég er mjög hungraður í fleiri titla. Þetta er ólýsanlega tilfinning og ég vil upplifa hana aftur," sagði Vincent Kompany í sigurvímu eftir leikinn í gær.

„Við misstum aldrei trúna og lífið er of stutt til að klúðra svona tækifæri. Við gerðum það næstum því en við áttum þetta skilið," sagði Kompany.

„Við vissum að United var að vinna sinn leik en töluðum alltaf um að einbeita okkur bara að okkar leik. Við þurfum að vinna okkar leik," sagði Kompany.

Mörk frá Edin Dzeko og Sergio Aguero í uppbótartíma tryggðu City bæði sigur í leiknum og sigur í ensku úrvalsdeildinni. Það er hægt að sjá mörkin með því að smella hér fyrir ofan.