Martin Skrtel bestur hjá Liverpool á tímabilinu

Stuðningsmenn Liverpool hafa kosið Martin Skrtel besta leikmann liðsins á þessu tímabili en slóvakíski miðvörðurinn vann sér fast sæti í miðri vörn Liverpool á tímabilinu og spilaði alls 45 leiki með liðinu. Skrtel fékk 44 prósent atkvæða en næstur honum kom framherjinn Luis Suarez með 33 prósent atkvæða. Daniel Agger varð síðan í þriðja sæti.

Martin Skrtel er 27 ára gamall og er sannfærður um að þetta hafi verið hans besta tímabil. "Þetta er besta tímabilið síðan að ég kom til Liverpool og ég er mjög ánægður með frammistöðuna. Ég vona að ég haldi áfram á þessari braut," sagði Martin Skrtel í viðtali á heimasíðu Liverpool.

"Ég skoraði fleiri mörk en áður og ég spilaði betur en undanfarin ár. Ég vil þakka öllum sem kusu mig og það er frábær tilfinning að fá svona verðlaun. Þetta eru fyrstu stóru verðlaunin mín hjá Liverpool og ég er mjög ánægður með þetta," sagði Skrtel.

Það voru alls 66937 atkvæði sem bárust í netkosningunni á heimasíðu Liverpool og þetta var því mjög flott kosning hjá Slóvakanum öfluga.