Scholes spilar áfram með United

Paul Scholes ætlar að spila í eitt ár til viðbótar með Manchester United, að minnsta kosti. Þetta segir knattspyrnustjórinn Alex Ferguson.

Scholes hætti fyrir ári síðan en dró fram skóna á ný í janúar síðastliðnum. Hann kom alls við sögu í 21 leik, skoraði fjögur mörk og þótti með betri leikmönnum liðsins.

Hann spilaði síðast með enska landsliðinu árið 2004 en fjölmiðlar í Englandi fullyrtu um helgina að hann væri mögulega reiðubúinn að spila aftur með landsliðinu.

Scholes hefur allan sinn feril spilað með Manchester United og eru leikirnir orðnir tæplega 700 talsins.