City baðst afsökunar á dómgreindarleysi Tevez

Carlos Tevez hefur vakið reiði stuðningsmanna Manchester United fyrir spjald sem hann hélt á í sigurhátíð Manchester City í dag.

Á spjaldinu stóð „RIP Fergie" sem þýðir einfaldlega „Hvíl í friði, Fergie". Þar er vitanlega átt við Alex Ferguson, stjóra Manchester United.

Enskir fjömiðlar greina frá því í kvöld að Manchester City hefur sent frá sér afsökunarbeiðni og að Tevez hafi gert sig sekan um stórbrotið dómgreindarleysi.

Tevez kom til City frá United árið 2009 en hann varð enskur meistari með liðinu í tvígang. City var í dag að fagna meistaratitlinum sem félagið vann í gær á dramatískan máta.

Tevez var fjarverandi stóran hluta tímabilsins eftir að hafa neitað að koma inn á sem varamaður í leik með liðinu í haust.