Grétar Rafn staðfestir að hann fari frá Bolton

Grétar Rafn Steinsson hefur staðfest að hann verði ekki áfram hjá Bolton á næstu leiktíð en samningur hans við félagið rennur út nú í sumar.

Þetta sagði hann í samtali við Fótbolta.net í dag. „Það er klárt að ég verð ekki áfram. Núna verður maður að slaka á yfir sumarið og sjá hvað gerist. Það er ekkert ákveðið eða planað. Ég ætla að slaka á, ná mér af þessum meiðslum og sjá hvað gerist," sagði Grétar en hann missti af síðustu leikjum tímabilsins með Bolton vegna meiðsla.

„Ég tognaði framan í læri fyrir leikinn gegn Sunderland og hef ekki verið með síðan þá," bætti hann við en viðtalið má lesa í heild sinni hér.

Bolton féll úr ensku úrvalsdeildinni á sunnudaginn eftir að hafa gert 2-2 jafntefli við Stoke. Grétar Rafn segir að mistök dómara í leiknum hafi reynst liðinu dýrkeypt.