Kagawa hitti Sir Alex Ferguson í Manchester

Japanski leikmaðurinn Shinji Kagawa, sem spilar með Þýskalandsmeisturum Borussia Dortmund, var ekkert smeykur að segja blaðamönnum frá því að hann hafi fundað með Sir Alex Ferguson, stjóra Manchester United.

Shinji Kagawa hefur verið orðaður við Manchester United en hann er 23 ára sóknartengiliður sem var með 13 mörk og 11 stoðsendingar í 31 leik með Dortmund. Dortmund hefur unnið þýska meistaratitilinn bæði tímabilin Kagawa með félaginu.

„Það var gott að hitta hann og tala við hann," sagði Shinji Kagawa en hann talaði um að Ferguson hafi sagt við hann nokkur góð orð en vildi ekki gefa neitt meira upp hvað fór á milli þeirra á þessum tveggja tíma fundi. Ferguson horfði líka á Shinji Kagawa spila í 5-2 sigri Dortmund á Bayern í bikarúrslitaleiknum á laugardaginn.

Shinji Kagawa á eftir ár af samningi sínum við Borussia Dortmund en hann hefur ekki viljað skrifað undir nýjan samning og hefur talað um að hann ætli að hugsa sig vel um næsta skref.

Kagawa er spenntur fyrir ensku úrvalsdeildinni og Manchester United er ekki eina enska liðið sem hefur sýnt honum áhuga. Dortmund mun græða vel á honum ef liðið selur leikmanninn. Þýska félagið keypti hann á aðeins 350 þúsund evrur frá Cerezo Osaka árið 2010 en gæti fengið 13 milljónir evra fyrir hann í sumar.