Umboðsmaður Yaya Toure segir hann vilja fara frá Manchester City

Yaya Toure var einn af aðalmönnunum á bak við sigur Manchester City í ensku úrvalsdeildinni í vetur en nú virðist umboðsmaður hans vera farinn að auglýsa eftir áhugasömum félögum.

Yaya Toure varð bikarmeistari á fyrsta ári sínu með City og vann síðan enska meistaratitilinn um síðustu helgi. Hann kom til Manchester City frá Barcelona þar sem að hann spilaði frá 2007 til 2010.

Yaya Toure er með risasamning hjá City og það er ljóst að það eru mjög fá félög, ef nokkurt, sem geta borgað honum slík laun. Umboðsmaður hans heldur því fram að þessi 29 ára leikmaður þurfi nú nýtt og krefjandi verkefni.

„Hann hefur gert allt sem hann getur gert hjá City og nú þarf hann ný og krefjandi verkefni," sagði Dimitri Seluk, umboðsmaður Yaya Toure.

„Toure gæti samið við mörg stórlið eins og Chelsea eða Bayern München. Ég vildi líka sjá Barcelona reyna fyrir sér í þessu kapphlaupi," sagði Seluk í viðtali við The Sun.

„Ég hef talað við Barcelona og þeir vita um stöðu mála. Ég er ekki viss um hvort Real Madrid hafi áhuga en ég veit að Jose Mourinho er hrifinn af honum," sagði Seluk.