Leitin að nýjum stjóra Liverpool á byrjunarstigi

Eigendur Liverpool ráku í gær Kenny Dalglish en eiga enn langt í land að finna næsta knattspyrnustjóra félagsins. Stjórnarformaðurinn Tom Werner og aðaleigandinn John W Henry eru byrjaðir að leita að fjórða stjóra Liverpool á tveimur árum og margir koma enn til greina samkvæmt frétt BBC.

Aðilar á vegum Liverpool hafa meðal annars rætt við Andre Villas-Boas en það þykir ekki líklegt að honum verði boðið starfið. Rafael Benitez, fyrrum stjóri Liverpool, kemur til greina en flestir hafa nefnt til sögunnar Roberto Martinez, stjóra Wigan. Nýr stjóri fær væntanlega að kaupa leikmenn fyrir 30 milljónir punda í sumar.

Eigendur Liverpool eru einnig að leita að yfirmanni fótboltamála hjá félaginu og BBC hefur heimildir fyrir því að félagið hafi þegar rætt við bæði Johan Cruyff og Txiki Begiristain sem var í svipuðu starfi hjá Barcelona.

Kenny Dalglish er aftur á móti farinn í frí með fjölskyldunni til Spánar. Aðstoðarmaður hans, Steve Clarke, ákvað að hætta hjá félaginu eftir brottreksturinn í gær út af hollustu við Dalglish.