Alan Hansen: Dalglish verður niðurbrotinn maður

Alan Hansen, fyrrum liðsfélagi Kenny Dalglish og góður vinur þessa fyrrum stjóra Liverpool, telur að það muni hafa mikil áhrif á hinn 61 árs gamla Dalglish að hann hafi þurft að taka pokanna sinn í gær. Eigendur Liverpool ákváðu að reka Dalglish þrátt fyrir að hann ætti enn eftir tvö ár af samningi sínum.

„Kenny verður niðurbrotinn og sjokkeraður af því að hann elskar Liverpool Football Club og stuðningsmenn félagsins. Það gaf honum aukakraft að labba inn um dyrnar á Anfield og hann verður mjög viðkvæmur þar sem að hann fær ekki lengur að vera stjóri félagsins," sagði Alan Hansen við BBC.

„Ég sem góður vinur hans veit hvað hann hefur gefið mikið af sér. Hann hefur sett hjarta og sál sína í starfið. Ég hringdi kannski í hann á sunnudegi en þá var hann samt mættur í vinnuna. Hann elskaði að vera hjá Liverpool," sagði Hansen.

„Hann var fullur af orku og enginn gæti lagt meira á sig sem stjóri Liverpool því hann elskaði félagið svo mikið. Amerísku eigendurnir hafa sett skýr og ákveðin markmið með því að reka hann því þeir eru að segja að það eina sem skiptir máli er Meistaradeildin," sagði Hansen og bætti við:

„Við megum samt ekki gleyma því hvernig ástandið var hjá Liverpool þegar Kenny kom til baka í janúar 2011 því það hafði ekki verið verra í 30 ár. Félagið var komið niður hnén og það var ekki hægt að fara þaðan og beint inn í Meistaradeildina á aðeins einu ári," sagði Hansen.

„Næsti stjóri verður sá fjórði á tveimur árum. Þetta er að verða eins og hjá Chelsea með allar þessum breytingum. Þetta var því mjög stór ákvörðun og þeir þurfa að finna nýjan stjóra sem fyrst," sagði Hansen.