Diarra verður áfram hjá Fulham

Miðvallarleikmaðurinn Mahamadou Diarra verður áfram í herbúðum Fulham í eitt ár til viðbótar. Hann kom við sögu í alls ellefu leikjum með liðinu á nýliðnu tímabili.

Diarra kom til Fulham í janúar en þá var hann án félags. Þá skrifaði hann undir samning til loka tímabilsins en með þann möguleika að framlengja hann um eitt ár, sem var svo gert í dag.

Áður lék hann með Real Madrid, Lyon og Monaco en Diarra er þrítugur að aldri og kemur frá Malí.

Frá 2002 til 2008 varð hann meistari öll árin með þeim liðum sem hann spilaði. Fyrst fjórum sinnum með Lyon í Frakklandi og svo tvívegis með Real Madrid á Spáni. Hann fór til AS Monaco fyrir tímabilið 2010-2011 en náði sér ekki á strik þar.