Capello sækist eftir stjórastólnum hjá Chelsea

Fabio Capello, fyrrum landsliðsþjálfari Englendinga, er að leita sér að starfi í ensku úrvalsdeildinni og hefur nú gefið það út að hann vilji helst fá tækifæri til að stýra liði Chelsea. Þetta kemur fram í Guardian sem hefur heimildir fyrir því að Capello hafi látið forráðamenn Chelsea vita af áhuga sínum.

Capello ætlar að mæta á úrslitaleik Meistaradeildarinnar í München um helgina en það verður síðasti leikur Chelsea undir stjórn Roberto Di Matteo sem tók við liðinu tímabundið. Frábær frammistaða Chelsea-liðsins undir stjórn Di Matteo hefur þó aukið líkurnar á því að hann fái fastráðningu en það er þó ekki öruggt.

Roman Abramovich, eigandi Chelsea, vill helst ráða Pep Guardiola en Spánverjinn hefur hafnað tveimur risatilboðum frá Chelsea og stendur fast á þeirri ákvörðun sinni að taka sér ársfrí.

Capello á enn íbúð í Chelsea-hverfinu og var áður búinn að lýsa yfir áhuga á því að stýra liði í ensku úrvalsdeildinni. Hann nefndi ekki Chelsea á nafn en talaði um að fá að stýra liðið sem væri klárt í að berjast um alla titla, bæði heima fyrir og í Meistaradeildinni.

Capello er orðinn 65 ára gamall og hafði stýrt enska landsliðinu undanfarin fjögur ár en hann hefur unnið níu titla á sextán tímabilum með AC Milan, Real Madrid, Roma og Juventus.