Avram Grant hættur hjá Partizan Belgrad - á leið til Englands?

Avram Grant, fyrrum stjóri Chelsea, Portsmouth og West Ham í ensku úrvalsdeildinni, hætti í dag sem þjálfari serbnesku meistarana í Partizan Belgrad. Grant hefur verið þjálfari liðsins síðan í janúar en hættir vegna persónlegra ástæðna.

Avram Grant tók við Partizan-liðinu í janúar og liðið gerði jafntefli í tveimur fyrstu leikjunum. Liðið vann síðan tíu næstu leiki sína og tryggði sér titilinn.

Um leið og fréttist af því að Avram Grant væri laus allra mála hjá Partizan þá fóru menn að orða hann við laus störf í ensku úrvalsdeildinni. Hann var síðast hjá West Ham sem féll úr ensku úrvalsdeildinni udnir hans stjórn.

Grant tókst ekki að vinna titil á Englandi en varð fjórum sinnum í öðru sæti, þrisvar með Chelsea (enska deildin 2008, Meistaradeildin 2008, enski deildarbikarinn 2008) og einu sinni með Portsmouth (enski bikairnn 2010).