Sir Alex fluttur á sjúkrahús

The Sun segir frá því að Sir Alex Ferguson, stjóri Manchester United, hafi verið fluttur á sjúkrahús í Glasgow í gærkvöldi eftir að hafa fengið svakalegar blóðnasir. Ferguson er orðinn sjötugur en hann var í Glasgow í tilefni af 40 ára afmælis sigurs Rangers í Evrópukeppni bikarhafa árið 1972.

Ferguson lék með Rangers-liðinu á sjöunda áratugnum og átti að flytja ræðu á hófinu en þarna voru mættir meira en þúsund gestir. Rétt áður en kom að ræðunni þá varð Sir Alex að draga sig í hlé eftir að hafa fengið blóðnasir.

Það blæddi síðan svo mikið að ákveðið var að fara með Ferguson á sjúkrahús. "Ég sá hann á bílastæðinu, það blæddi úr nefinu hans og honum leið greinilega illa," sagði heimildarmaður The Sun.

Læknarnir skoðuðu Ferguson á sjúkrahúsinu en fundu ekkert alvarlegt að og hann fékk því að fara heim til sín snemma í morgun.