Swansea þarf væntanlega að tvöfalda félagsmetið til að kaupa Gylfa

Eins og kom fram í gær þá stefnir allt í það að Swansea City sé að ná samningum við þýska liðið Hoffenheim um kaup á íslenska landsliðsmanninum Gylfa Þór Sigurðssyni. Stjórnarmaðurinn Huw Jenkins eyddi síðustu dögum í Þýskalandi við að reyna að semja um kaupverð og velskir fjölmiðlar hafa sagt frá því að það sé stutt í að samningar náist.

Huw Jenkins er kominn til baka til Swansea til þess að fara yfir stöðu mála með stjóranum Brendan Rodgers en þó að Gylfi hafi gefið það út að hann vilji vera áfram hjá Swansea-liðinu, þá hefur heyrst af miklum áhuga annarra liða eins og Newcastle.

Hoffenheim hefur þegar hafnað einu tilboði Swansea í Gylfa og það er orðið ljóst að ef velska liðið ætlar að kaupa íslenska miðjumanninn frá þýska liðinu þá þurfa menn væntanlega að meira en tvöfalda þá upphæð sem félagið hefur mest greitt fyrir einn leikmann.

Dýrasti leikmaðurinn í sögu Swansea er framherjinn Danny Graham en Swansea borgaði 3,5 milljónir punda þegar félagið keypti hann frá Watford í fyrrasumar.

Hoffenheim borgaði Reading 6,5 milljónir punda fyrir Gylfa og það er í það minnsta öruggt að þýska liðið ætlar ekki að tapa á íslenska landsliðsmanninum.

Velskir fjölmiðlar telja líklegt að kaupverðið verði á endanum í kringum tíu milljónir evra eða um 8 milljónir punda. Fari svo mun Gylfi verða langdýrasti leikmaðurinn í 100 ára sögu Swansea enda Swansea-menn búnir að tvöfalda félagsmetið til að kaupa hann.