Ole Gunnar tekur ekki við liði Aston Villa

Ole Gunnar Solskjær hélt blaðamannafund í Molde í dag þar sem að hann tilkynnti norskum blaðamönnum að hann ætlaði ekki að taka við enska úrvalsdeildarliðinu Aston Villa heldur halda áfram sem þjálfari Molde.

Ole Gunnar var sóttur með einkaflugvél til Noregs í gær og fundaði með forráðamönnum Aston Villa í Birmingham. Hann snéri síðan til baka til Noregs seint í gær og ákvað í framhaldinu að segja nei við stjórastöðunni hjá Aston Villa.

Ole Gunnar sagðist á blaðamannafundinum hafa metnað til þess að gerast stjóri í ensku úrvalsdeildinni en að hann ætli nú að einbeita sér að því að klára samning sinn við Molde sem nær til ársins 2013.

„Ég bjóst ekki við að fá fyrirspurnir svona snemma. Ég er bara búinn að vera heima í eitt og hálft ár og er ekki að leita að nýju starfi. Börnunum mínum líður vel, konunni líður vel, mér líður vel og það gengur vel. Ég fer samt aldrei leynt með það að ég hef metnað til að stýra liði í ensku úrvalsdeildinni," sagði Ole Gunnar Solskjær.