Stóri Sam: Fyrsta sinn á tímabilinu þar sem við vinnum leik í lokin

Sam Allardyce, stjóri West Ham, er orðinn úrvalsdeildarstjóri á nýjan leik eftir að hans menn unnu 2-1 sigur á Blackpool í úrslitaleik umspilsins um laust sæti í ensku úrvalsdeildinni en spilað var á Wembley í dag. Það var Ricardo Vaz Te sem skoraði sigurmarkið þremur mínútum fyrir leikslok.

„Ég sagði ykkur að þetta yrði erfitt og Blackpool-liðið voru eins góðir og við í þessum leik. Við höfðum heppnina með okkur og þetta er í fyrsta sinn í 49 leikjum á tímabilinu þar sem við vinnum leik á lokamínútunum. David Sullivan er búinn að vera að stríða mér á því," sagði Sam Allardyce.

Kevin Nolan, fyrirliði West Ham, var líka kátur í leikslok. „Ég er mjög ánægður. Blackpool-menn voru frábærir en það þarf alltaf annað liðið að tapa. Þetta er fyrsta skrefið, við ætlum að njóta sumarsins og fara síðan að hlakka til að vera orðnir úrvalsdeildarleikmenn á ný. Við spiluðum ekki okkar besta leik í dag en ég samt rosalega ánægður því það sést á öllum hvað þetta skiptir miklu máli fyrir félagið," sagði Kevin Nolan.