Fabrice Muamba mun mæta aftur á völlinn í kvöld þegar að félagar hans í Bolton mæta Tottenham í ensku úrvalsdeildinni.
Muamba hné niður vegna hjartaáfalls í bikarleik gegn Tottenham á White Hart Lane fyrir sex og hálfri viku síðan. Hjarta hans sló ekki af sjálfsdáðum í 78 mínútur og var honum vart hugað líf.
En þökk sé snarræði lækna og sjúkraliða á vellinum og sjúkrahúsinu þangað sem hann var fluttur tókst að bjarga lífi hans. Bati hans hefur verið með ólíkindum og var hann fyrir stuttu síðan útskrifaður af sjúkrahúsinu.
Hann mun svo heilsa upp á stuðningsmenn Bolton í fyrsta sinn eftir atvikið fyrir leikinn gegn Tottenham í kvöld. Owen Coyle, stjóri Bolton, sagði að hann ætlaði einnig að þakka leikmönnum og stuðningsmönnum Tottenham fyrir sýndan stuðning.
„Fabrice veit að honum hefur staðið til boða að koma þegar hann telur sig tilbúinn. Við munum taka honum með opnum örmum," sagði Coyle við enska fjölmiðla.
„Hann fær frábært tækifæri í kvöld til að þakka stuðningsmönnum beggja liða. Það var ótrúlegt að hugsa til þess hvernig stuðning hann fékk á sínum tíma."
„Hann mun einnig fá tækifæri til að þakka leikmönnum Tottenham. Margir þekkja hann persónulega og það var augljóst að sjá hversu umhugað þeim var um hann."
Bolton er enn í fallsæti og því verður leikurinn í kvöld afar mikilvægur. „Við munum ekki gleyma því. Við þráðum allir að hann myndi ná aftur heilsunni og það hefur verið frábært að fylgjast með honum. En við þurfum að sinna okkar vinnu og sem betur fer eru okkar örlög enn í okkar höndum."
Leikurinn hefst klukkan 19.00 og verður sýndur í beinni útsendingu á Stöð 2 Sport 5.
Muamba ætlar að þakka stuðningsmönnum Tottenham
