Hodgson: Kemur til greina að velja Foster

Roy Hodgson, nýráðinn þjálfari enska landsliðsins, segir að það komi vel til greina að velja markvörðinn Ben Foster aftur í enska landsliðið.

Foster hætti að gefa kost á sér fyrir ári síðan eftir að hafa fengið afar fá tækifæri hjá Fabio Capello, þáverandi landsliðsþjálfara.

Hann hefur spilað undir stjórn Hodgson hjá West Brom í vetur en Hodgson fékk hann þangað sem lánsmann frá Birmingham.

„Ég get í raun ekki leyft mér að tala um einstaka leikmenn eða hvaða leikmenn koma til greina á þessari stundu," sagði Hodgson við enska fjölmiðla.

„Ég verð að taka tillit til þess. En Ben Foster verður einn þeirra leikmanna sem munu koma til greina hjá mér. Hann er góður markvörður og hefur bætt sig mikið hjá West Brom í vetur."

„Hann fékk á sig 1-2 mörk í upphafi tímabilsins þar sem hann átti að gera betur en hann hefur staðið sig virkilega vel á seinni hluta tímabilsins."