Pennant handtekinn vegna líkamsárásar og ölvunaraksturs

Fréttavefur Sky Sports greinir frá því að Jermaine Pennant, leikmaður Stoke, hafi verið handtekinn eftir að ráðist var á konu á skemmtistað í Manchester um helgina.

Lögreglan hefur staðfest að árásin átti sér stað og að 29 ára gamall karlmaður hafi verið handtekinn.

Tveimur klukkustundum síðar lenti Penant í bílslysi og er hann grunaður um að hafa ekið undir áhrifum áfengis. Hann var þar að auki án ökuleyfis og bifreið hans ótryggð.

Ökumaður hins bílsins var fluttur á sjúkrahús vegna minniháttar meiðsla í baki.

Pennant þarf að mæta fyrir dómara eftir eina viku vegna umferðarlagabrotanna.

Pennant hefur átt skrautlegan feril. Hann hefur leikið með Arsenal, Liverpool, Birmingham og Real Zaragoza en einnig komist margsinnis í fréttirnar vegna hegðun sinnar utan vallar.