Campbell leggur skóna á hilluna

Sol Campbell hefur gefið það út að hann hafi bundið enda á atvinnumannaferil sinn í knattspyrnu en hann nær yfir tvo áratugi.

Campbell var síðast á mála hjá Newcastle en fór frá félaginu síðstliðið vor. Ferillinn hófst hjá Tottenham árið 1992.

„Það var erfitt að ákveða að sleppa takinu og þess vegna hef ég verið að bíða með þessa ákvörðun í svo langan tíma," sagði hann í viðtali við Sky Sports í dag.

Hann spilaði alls 646 leiki með fimm mismunandi félögum frá 1992 til 2011 og kom við sögu í alls 73 leikjum enska landsliðsins. Hann tók þátt í þremur stórmótum með því.

Einna frægastur er hann fyrir að hafa farið frá Tottenham til Arsenal árið 2001 en hann skapaði sér með því miklar óvinsældir meðal stuðningsmanna fyrrnefnda liðsins.

Hjá Arsenal naut hann mikillar velgengnar og varð til að mynda tvívegis enskur meistari með liðinu sem og tvívegis enskur bikarmeistari. Hann skoraði líka mark í úrslitaleik Meistaradeildar Evrópu árið 2006 en þá tapaði Arsenal fyrir Barcelona.

Hann spilaði sinn síðasta leik í mars í fyrra.