Liverpool tapaði tíu milljörðum á síðasta fjárhagsári

Það gengur ekki bara illa hjá Liverpool í ensku úrvalsdeildinni því mikið tap var á rekstri félagsins á síðasta fjárhagsári. Liverpool tilkynnti það í dag að félagið hafi þá tapað 50 milljónum punda eða tíu milljörðum íslenskra króna.

Eigendurnir í Fenway Sports Group eyddu skuldum upp á 200 milljónir punda þegar þeir eignuðustu félagið í október 2010 en þeir þurftu að afskrifa 35 milljónir punda vegna þess að hætt var við verkefnið í kringum nýjan völl í Stanley Park.

Tapið vegna Stanley Park verkefnisins vegur þungt í skuldasöfnuninni á síðasta fjárhagsári og hafa yfirmenn félagsins bent á það að það skekki myndina mikið.

Árskýrslan sýnir einnig að Liverpool þurfti að borga 8,4 milljónir punda í starfslokasamninga, þar á meðal við þá Roy Hodgson, fyrrum knattspyrnustjóra liðsins, og Christian Purslow, fyrrum framkvæmdastjóra félagsins.

Reikningarnir innihalda reyndar ekki nýjan risasamning við íþróttavöruframleiðandann Warrior Sports fyrirtækið sem á að skila félaginu 25 milljónir punda á ári. Það eru því góðar fréttir fyrir Liverpool.