Papiss Cisse: Besta markið mitt á ferlinum

Papiss Cisse hefur heldur betur slegið í gegn í ensku úrvalsdeildinni eftir að Newcastle keypti hann frá þýska liðinu SC Freiburg í janúarglugganum.

Cisse hefur skorað 13 mörk í tólf fyrstu leikjum sínum í enska boltanum og þar af eru tvö frábær mörk í sigrinum á Chelsea í gærkvöldi. Fyrra markið var vissulega glæsilegt en það er seinna markið sem allir eru að tala um.

„Þetta var frábært mark og besta markið mitt á ferlinum. Ég var mjög ánægður með að ná að skora svona mark," sagði hinn 26 ára gamli Senegalmaður. Hann skoraði þá með skoti utan af kanti sem sveif yfir Petr Cech og datt í fjærhornið.

„Þegar boltinn barst til mín þá hugsaði ég bara um að skora. Þetta var eiginlega bara ósjálfrátt," sagði Cisse en það má mörkin hans með því að smella hér fyrir ofan.

„Ég var einnig mjög ánægður með fyrsta markið því það var mjög mikilvægt fyrir liðið. Þetta var gott kvöld fyrir mig og liðið mitt," sagði Cisse.

„Ég kom í ensku úrvalsdeildina til að sýna hvað ég gæti og það gengur allt mjög vel. Ég nýt fótboltans og allt er í fínum gír innan sem utan vallar," sagði Cisse sem hefur skorað í 9 af 12 leikjum sem hann hefur spilað fyrir Newcastle í ensku úrvalsdeildinni.