Sir Alex hrósar Gylfa og félögum í Swansea

Sir Alex Ferguson, stjóri Manchester United, er hrifinn af því sem Brendan Rodgers er búinn að gera með nýliða Swansea í ensku úrvalsdeildinni á þessu tímabili. United mætir Swansea á sunnudaginn og þarf helst að vinna stórt í baráttunni um enska meistaratitilinn við Manchester City.

„Það hefur verið aðdáunarvert að sjá það hvernig Swansea-liðið hefur spilað á þessu tímabili. Þeir hafa spilað frábæran sóknarbolta og stjórinn þeirra hefur aldrei fallið frá hugmyndafræði sinni," sagði Sir Alex Ferguson.

„Þeir hafa átt frábært tímabil og það lítur út fyrir að þeir njóti þess að spila sinn fótbolta. Þeir vilja hafa boltann og spila honum," sagði Ferguson.

„Þegar við erum að tala um stjóra tímabilsins þá hlýtur það alltaf að koma inn í dæmið úr hvaða leikmönnum viðkomandi stjóri hefur yfir að ráða. Brendan Rodgers kom upp úr b-deildinni og bætti bara tveimur leikmönnum við hópinn," sagði Ferguson og á þá við þá Danny Graham frá Watford og Gylfa Þór Sigurðsson frá Hoffenheim.

„Hann treysti þeim mönnum sem komu liðinu upp í ensku úrvalsdeildina og þeir hafa launað honum," sagði Ferguson.