Rooney á besta markið í sögu ensku úrvalsdeildarinnar

Markið sem Wayne Rooney skoraði fyrir Manchester United gegn Manchester City í febrúar í fyrra hefur verið valið besta markið frá stofnun ensku úrvalsdeildarinnar.

Markið skoraði Rooney með bakfallsspyrnu þegar skammt var til leiksloka. United vann leikinn og náði átta stiga forystu á City. Liðið stóð á endanum uppi sem Englandsmeistari og vann þar með titilinn í nítjánda sinn.

Kosningin var haldin í tilefni af 20 ára afmæli ensku úrvalsdeildarinnar en hundruðir þúsunda tóku þátt í henni. Mark Rooney fékk 26 prósent atkvæðanna. Dennis Bergkamp kom næstur með nítján prósent fyrir markið sem hann skoraði fyrir Arsenal gegn Newcastle í mars árið 2002.

„Ég ólst upp við að horfa á ensku úrvalsdeildina og því er það frábær tilfinning að markið hafi verið kosið það besta," sagði Rooney við þetta tilefni.

„Það hafa svo mörg glæsileg mörk verið skoruð í gegnum tíðina. Ég er afar stoltur af þessu og vil þakka öllum þeim sem kusu mig."