Agüero valinn leikmaður ársins hjá City

Manchester City hefur verðlaunað sína leikmenn fyrir frammistöðuna á tímabilinu og framherjinn Sergio Agüero valinn bestur.

Stuðningsmenn tóku þátt í valinu en Agüero hefur verið frábær á tímabilinu og skorað 29 mörk í öllum keppnum. Mark hans í 6-1 sigri City á Norwich var svo valið besta mark tímabilsins.

Besta augnablik tímabilsins var nýlegur 1-0 sigur City á grönnum sínum í Manchester United en þar með komust þeir aftur á topp deildarinnar og eiga góðan möguleika á að vinna sinn fyrsta meistaratitil í langan tíma.

Spánverjinn Denis Suarez var valinn besti ungi leikmaður ársins en hann leikur með yngri liðum félagsins. David Silva var valinn leikmaður ársins af liðsfélögum sínum og Vincent Kompany var sérstaklega heiðraður fyrir störf sín í þágu samfélagsins.