Tímamót hjá Arsenal á morgun - leikur númer 900 undir stjórn Wenger

Arsene Wenger, stjóri Arsenal, mun stýra liðinu í 900. sinn þegar liðið tekur á móti nýliðum Norwich í ensku úrvalsdeildinni á morgun. Wenger hefur verið stjóri félagsins síðan í október 1996.

Arsenal hefur unnið 513 af 899 leikjum undir stjórn Wenger og aðeins tapað 172 leikjum. Hann státar af 57 prósent sigurhlutfalli. Arsenal hefur unnið ensku deildina þrisvar sinnum og enska bikarinn fjórum sinnum á þessum tæpu sextán árum.

Fyrsti leikur Wenger var á móti Blackburn Rovers í október 1996 og Arsenal vann leikinn 2-0. Arsenal endaði í 3. sæti í deildinni og hefur aldrei endað neðar en í fjórða sæti í stjóratíð Wenger.

Arsenal er nú harðri samkeppni við Tottenham og Newcastle um 3. og 4. sæti og þar með sæti í Meistaradeildinni. Velgengni Chelsea í Meistaradeildinni setur enn meiri pressu á liðin að ná þriðja sætinu því vinni Chelsea Meistaradeildina þá fara aðeins þrjú efstu liðin (og Chelsea) í Meistaradeildina á næsta tímabili.