Tottenham fór illa að ráði sínu gegn Aston Villa

Tottenham mistókst að komast upp í þriðja sæti ensku úrvalsdeildarinnar þar sem að liðið gerði 1-1 jafntefli við Aston Villa á útivelli í dag.

Ciaran Clark kom Villa yfir þegar að skot hans breytti um stefnu á William Gallas og hafnaði í marki Tottenham-manna.

Útlitið dökknaði enn þegar að Danny Rose fékk beint rautt spjald fyrir tæklingu á Alan Hutton. Gareth Bale hafði þá komist nálægt því að skora en Shay Given varði frá honum.

Tottenham náði þó að bjarga stigi þegar að Richard Dunne braut á Sandro í teignum og vítaspyrna dæmd. Emmanuel Adebayor skoraði og kom þó liðinu upp í fjórða sæti deildarinnar.

Arsenal heldur því enn þriðja sætinu þrátt fyrir að hafa gert jafntefli við Norwich í gær. Liðið er með 67 stig, Tottenham 66 og Newcastle 65. Chelsea getur svo komist upp í 64 stig með sigri á Liverpool á þriðjudagskvöldið.

Leikir liðanna í lokaumferðinni:

West Brom - Arsenal

Tottenham - Fulham

Chelsea - Blackburn

Everton - Newcastle