Ferguson: Everton-leikurinn gerði út af við okkur

Alex Ferguson, stjóri Manchester United, segir að 4-4 jafnteflið við Everton á dögunum hafi verið banabiti félagsins í titilbaráttunni.

United missti 4-2 forystu niður í jafntefli á lokamínútunum. Jafnteflið gerði Manchester City kleift að minnka forystu United í þrjú stig.

City-menn unnu svo granna sína í United á dögunum eins og kunnugt er og jöfnuðu þar með United að stigum. City er hins vegar á toppnum þar sem liðið er með betra markahlutfall en tvær umferðir eru nú eftir af tímabilinu.

„Við þurfum að horfast í augu við að ef við töpum deildinni þá var það vegna leiksins gegn Everton - það er enginn vafi á því. Sá leikur gerði út af við okkur," sagði Ferguson við enska fjölmiðla.

„Frammistaða okkar síðustu tíu mínútur leiksins var algerlega út í hött. Við vorum afar kærulausir. Við fórum heimskulega að."

United þarf nú að vinna síðustu tvo leiki sína, gegn Swansea og Sunderland, og treysta á að City misstígi sig annað hvort gegn Newcastle á morgun eða QPR um næstu helgi.

Newcastle vann 2-0 sigur á Chelsea nú fyrr í vikunni með tveimur mörkum frá Papiss Cisse. Síðara markið skoraði hann með ótrúlegu skoti en Ferguson var hrifnari af fyrra markinu.

„Hann varð að leggja boltann fyrir sig og það var svo ótrúlegt að sjá hann setja boltann upp í markhornið af þessu færi."