Sagna missir af EM í sumar

Bacary Sagna mun ekki spila með Frökkum á EM í sumar en hann fótbrotnaði í leik Arsenal og Norwich í dag.

Sagna braut bein í sama fæti fyrr á tímabilinu og var þá frá í þrjá mánuði. Hann var sparkaður niður snemma í leiknum í dag en hélt þó áfram að spila. Sagna féll svo til jarðar eftir um 30 mínútna leik og var þá skipt af velli.

Sagna á alls 32 landsleiki að baki með franska landsliðinu og hefur verið fastamaður í því undanfarin ár. Hann missti reyndar af EM 2008 vegna meiðsla en spilaði með Frökkum á HM 2010 í Suður-Afríku.

Frökkum gekk reyndar skelfilega í því móti og féll úr leik í riðlakeppninni eftir að hafa tapað óvænt fyrir gestgjöfunum.