Redknapp furðar sig á vinnubrögðum enska sambandsins

Harry Redknapp segir að það hafi stundum verið erfitt hversu fyrirferðamikið nafn hans var í umræðunni um landsliðsþjálfarastöðuna í Englandi.

Fabio Capello hætti fyrr í vetur og var Redknapp um leið sagður langlíklegastur til að verða ráðinn í starfið.

En nýr maður var ekki ráðinn fyrr en 1. maí og kom mörgum á óvart að Roy Hodgson, stjóri West Brom, varð fyrir valinu.

Tottenham byrjaði tímabilið mjög vel en fataðist flugið mjög um leið og Redknapp var orðaður við enska landsliðsþjálfarastarfið.

„Þetta tók ansi langan tíma. Ég veit ekki af hverju þeir gengu ekki frá þessu fyrir sex vikum síðan. Ég skil ekki hvað vandamálið var - West Brom var ekki á leiðinni niður," sagði Redknapp við enska fjölmiðla. „Vangavelturnar voru stanslausar."

„Ég er ekki á leiðinni frá Tottenham. Mér líður alveg eins gagnvart þessu starfi í dag og fyrir nokkrum árum síðan. Ég er ekki þreyttur og er í góðu starfi."