Lampard skorar á stjórn Chelsea að framlengja við Drogba

Leikmenn Chelsea eru alls ekki spenntir fyrir því að missa framherjann Didier Drogba og Frank Lampard, miðjumaður liðsins, hefur skorað á stjórn félagsins að bjóða Drogba nýjan samning.

Hinn 34 ára gamli framherji hefur sýnt í vetur að hann á talsvert eftir og hefur verið í lykilhlutverki hjá Chelsea-liðinu síðustu vikur.

"Ég vil endilega að hann verði áfram. Hann má ekki fara enda frábær leikmaður. Maðurinn er einstök maskína," sagði Lampard.

"Hann er alveg einstakur og skorar alltaf mörk þegar á þarf að halda. Það er ekki hægt að meta svona mann til fjár."

Samningur Drogba við félagið rennur út í sumar og hann hefur verið orðaður við lið í Kína, Bandaríkjunum og Frakklandi meðal annars.