Verður ekki með á EM í sumar vegna krabbameins föðurs síns

James McCarthy, miðjumaður Wigan og írska landsliðsins í fótbolta, verður ekki með Írum á Evrópumótinu í Póllandi og Úkraínu í sumar. McCarthy ætlar ekki að gefa kost á sér vegna veikinda föðurs síns.

McCarthy er aðeins 21 árs gamall og spilar á miðjunni hjá Wigan en hann hefur spilað 31 leik í ensku úrvalsdeildinni á tímabilinu. Hann er fæddur í Skotlandi en valdi það að spila fyrir írska landsliðið. McCarthy á að baki 3 A-landsleiki.

„Ég hef tekið mjög erfiða ákvörðun sem er að gefa ekki kost á mér í Evrópumótið í sumar. Þetta geri ég vegna þess að faðir minn greindist með krabbamein og er nú í meðferð vegna veikinda sinna," sagði James McCarthy í yfirlýsingu.

„Ég hef rætt þetta við þjálfarann og hann var mjög skilningsríkur. Ég vil þakka honum fyrir það. Ég vil engu að síður nota þetta tækifæri og ítreka hollustu mína við írska landsliðið í fótbolta," sagði McCarthy í umræddri yfirlýsingu.

„Það er mikill heiður fyrir mig og fjölskyldu mína þegar ég spila með landsliðinu. Þó að ég verði ekki með liðinu núna þá vil ég óska þjálfaranum og liðsfélögunum góðs gengis á mótinu. Ég vona að stuðningsmenn írska landsliðsins skilji þessa ákvörðun mín á þessum erfiðu tímum," sagði McCarthy.