Nick Barmby rekinn eftir aðeins sex mánuði í starfi

Nick Barmby, fyrrum leikmaður Everton, Liverpool og Leeds United, entist ekki lengi í sínu fyrsta stjórastarfi en hann tók við liði Hull City í nóvember. BBC sagði frá því að hann hafi verið látinn taka pokann sinn eftir fund með eigendunum í morgun.

Barmby er 38 ára gamall en hann endaði fótboltaferillinn hjá Hull City og lék 180 leiki fyrir félagið frá 2004 til 2012. Hann var fyrr í vetur búinn að "fórna" fótboltaferlinum fyrir stjórastarfið en er nú atvinnulaus.

Barmby fékk stjórastarfið hjá Hull þegar Nigel Pearson hætti í nóvember. Hann tók tímabundið við í byrjun og vann meðal annars sinn fyrsta leik. Hann ákvað síðan að leggja skóna á hilluna í janúar og var fastráðinn fjórum dögum síðar.

Hull vann "aðeins" 13 af 33 leikjum undir hans stjórn og endaði í 8. sæti, sjö stigum frá sæti í umspili um laust sæti í ensku úrvalsdeildinni. Hull vann 6 af fyrstu 13 leikjunum undir stjórn Pearson.

Hull átti ágætan endasprett og fékk 10 stig út úr síðustu fimm leikjum sínum en enskir miðlar vilja að meina að Barmby hafi verið ósáttur með stefnu eiganda Hull í leikmannamálum.