Mirror: Guardiola hafnaði 2,4 milljörðum á ári frá Chelsea

Enska slúðurblaðið Mirror heldur því fram að Pep Guardiola, fráfarandi þjálfari Barcelona, hafi hafnað risatilboði um að taka við Chelsea-liðinu í sumar.

Mirror hefur heimildir fyrir því að Cheslea hafi boðið Guardiola tólf milljón punda í árslaun sem gera um 2,4 milljarða íslenskra króna. Guardiola er ákveðinn að taka sér eitt ár í frí og þetta risatilboð breytti víst engu um.

Roman Abramovich, eigandi Chelsea, vill fá Guardiola sem hefur náð frábærum árangri með Barcelona-liðið sem hefur unnið þrettán titla á fjórum tímabilum undir hans stjórn.

Roberto Di Matteo tók við Chelsea-liðinu tímabundið þegar Andre Villas-Boas var rekinn í mars. Undir hans stjórn hefur Chelsea-liðið bjargað tímabilinu, komist alla leið í úrslitaleik Meistaradeildarinnar og tryggði sér nú síðasta enska bikarmeistaratitilinn um síðustu helgi. Það þykir líklegt að Di Matteo fá starfið þar sem að Guardiola er ekki til í slaginn á Brúnni.

Inn í tilboðinu til Guardiola voru ennfremur fullt af pening til að kaupa sterka leikmenn til félagsins í sumar og það er ljóst að Guardiola hefði þá fengið tækifæri til að fá nokkra leikmenn frá sínu gamla félagi, Barcelona.