Landsliðsþjálfari Bosníu vill að Dzeko skipti um félag

Landsliðsþjálfari bosníska landsliðsins, Safet Susic, hefur hvatt framherjann Edin Dzeko til þess að fara frá Man. City svo ferillinn hjá honum fari ekki í rugl.

Dzeko hefur ekki skorað síðan í febrúar og er orðinn fjórði framherji liðsins og von á fleiri framherjum í sumar.

Það er svo sannarlega enginn skortur á möguleikum fyrir þennan framherja sem kom frá Wolfsburg á 27 milljónir punda í janúar í fyrra. Á meðal þeirra liða sem hafa áhuga eru Juventus og FC Bayern.

Umboðsmaður Dzeko óttast að City muni setja of háan verðmiða á leikmanninn svo hann komist ekki frá City.